रब्बी हंगामातील पिकांसाठी जायकवाडी धरणातून तात्काळ पाणी सोडा! स्वाभिमानी शेतकरी संघटनेची जिल्हा प्रशासनाकडे मागणी; अन्यथा तीव्र आंदोलनाचा इशारा

गेवराई! विष्णु राठोड
रब्बी हंगामातील पिकांना सिंचनासाठी तसेच नागरिकांच्या पिण्याच्या पाण्याचा प्रश्न सोडविण्यासाठी जायकवाडी धरणातून तात्काळ पाणी सोडण्यात यावे, अशी मागणी स्वाभिमानी शेतकरी संघटनेचे बीड जिल्हा उपयुवा अध्यक्ष शेख खिजर जैनुद्दीन यांनी जिल्हा प्रशासनाकडे निवेदनाद्वारे केली आहे. यासंदर्भात जिल्हाधिकारी बीड व जलसंपदा विभागाच्या अधिकाऱ्यांना निवेदन देण्यात आले.

मराठवाड्यातील शेतकरी आधीच दुष्काळी परिस्थिती आणि वाढत्या शेती खर्चामुळे अडचणीत आहेत. रब्बी हंगामातील पिकांना पाण्याची नितांत गरज असताना धरणातून पाणी सोडण्यास विलंब झाल्यास पिकांचे मोठे नुकसान होण्याची भीती व्यक्त करण्यात आली आहे. तसेच अनेक गावांमध्ये पिण्याच्या पाण्याचा प्रश्नही गंभीर होत असल्याचे निवेदनात नमूद करण्यात आले आहे.

निवेदनानुसार, जायकवाडी धरणात (नाथसागर) सुमारे ७४.३३ टक्के जलसाठा उपलब्ध असल्याचे नमूद करून, उपलब्ध पाण्याचे योग्य नियोजन करून रब्बी पिकांसाठी तातडीने पाणी सोडावे, अशी मागणी करण्यात आली आहे. जिल्ह्यातील प्रत्येक शेतकऱ्याच्या शेतापर्यंत पाणी पोहोचेल, याची प्रशासनाने काटेकोर काळजी घ्यावी, अशीही मागणी करण्यात आली आहे.

शेतकऱ्यांच्या न्याय्य हक्कांचा विचार करून प्रशासनाने तातडीने सकारात्मक निर्णय घ्यावा. अन्यथा स्वाभिमानी शेतकरी संघटनेच्या वतीने लोकशाही व कायदेशीर मार्गाने तीव्र आंदोलन छेडण्यात येईल, असा इशारा निवेदनातून देण्यात आला आहे.या वेळी स्वाभिमानी शेतकरी संघटनेचे उप युवा जिल्हाअध्यक्ष
शेख खिजर जैनुद्दीन,जिल्हा अध्यक्ष दिनकर रिंगणे,यूवा जिल्हा अध्यक्ष बाळासाहेब शेंडगे, महीला तालुकाध्यक्ष सुनिता गील, जयदेव शिंगने,बाळू डहाळे यांच्यासह संघटनेच्या पदाधिकाऱ्यांनी शेतकऱ्यांच्या पाणीप्रश्नावर तातडीने कार्यवाही करण्याची मागणी केली आहे.